శంకరార్పణం - 2673

****************************************************************************************************

శంకరాభరణం సమస్య - 2673

"కరణము వద్దు మా కనెడు కాలము వచ్చె నిదేమి వింతయో"

మరచి విభక్తి జాబితలు మారణ హోమపు సంధి సూత్రముల్ 

కరచెడి యర్ధ సున్నలును క్త్వార్థక బాధలు తాళజాలకే 

పరుగులు బెట్టి పారుచును బాలురు చిన్నయ సూరి బాలవ్యా 

కరణము వద్దు మా కనెడు కాలము వచ్చె నిదేమి వింతయో

(కంది శంకరయ్య గారి సౌజన్యంతో)

**************************************************************************************************************************************************

శంకరార్పణం - 2672

******************************************************************************************************

శంకరాభరణం సమస్య - 2672

"కలుషమతుల్ దురాత్ముల కకారణ మిత్రులు గారె సత్కవుల్"

చెలియవి గుబ్బలొల్లుచును చెక్కిలి వన్నెను సంస్తుతించుచున్ 

పలుకుల బూతు లొల్కుచును పాపపు చింతల పద్యమల్లుచున్ 

కులుకుచు రాజు దీవెనల గుట్టుగ పట్టుచు మంత్రి కాళ్ళనున్

కలుషమతుల్ దురాత్ముల కకారణ మిత్రులు గారె సత్కవుల్

(కంది శంకరయ్య గారి సౌజన్యంతో)

*********************************************************************************************************************************************************

శంకరార్పణం - 2672

***************************************************************************************************

శంకరాభరణం సమస్య - 2672

"పద్యము వ్రాయఁగన్ యతులుఁ బ్రాసలతోఁ బని యేమి మిత్రమా"

విద్యల తల్లియై వెలసి వేళల నెంచక దిద్ది తీర్చుచున్ 

హృద్యపు రీతి భాసిలుచు హెచ్చులనాడక శాంతమూర్తియై

సద్యశ శంకరాభరణ శాస్త్రిని మొట్టగ నొజ్జయుండగా

పద్యము వ్రాయఁగన్ యతులుఁ బ్రాసలతోఁ బని యేమి మిత్రమా!

శాస్త్రి = ప్రభాకర శాస్త్రి et al

(కంది శంకరయ్య గారి సౌజన్యంతో)

**************************************************************************************************************************************************

శంకరార్పణం - 2671

****************************************************************************************************

శంకరాభరణం సమస్య - 2671

"భీతిని ముందు కేగిననె ప్రీతి జగద్విజయమ్ము దక్కురా"

చోదక పండితుండువాచ: 

ప్రీతిగ చూపెదన్ కనుము బ్రేకిది క్లచ్చిది థ్రాటిలిద్దిరా

తాతను సంస్మరించుకొని తాళపు చెవ్విని త్రిప్పుమిందులో

మూతి బిగించుటన్ విడిచి ముద్దుగ గేరున బండినుంచి ని

ర్భీతిని ముందు కేగిననె ప్రీతి జగద్విజయమ్ము దక్కురా!

(కంది శంకరయ్య గారి సౌజన్యంతో)

*************************************************************************************************************************************************

ఆకాశవాణి సమస్య 02.02.2019

**************************************************************************************************

ఆకాశవాణి సమస్య - 02.02.2019

"మూడును మూడు మూడు ననె మూర్ఖుల చిత్తము నొచ్చునట్లుగా"

మూడగు పుండ్రముల్ కలుగు ముచ్చటి వైష్ణవ బాలుడొక్కడున్ 

మూడగు నామముల్ కలుగు ముద్దుల శైవుల బాలికొక్కతెన్ 

కూడిన పుట్టగా కొడుకు కూతురు లిద్దరు బ్రహ్మ దేవుడే 

మూడును మూడు మూడు ననె మూర్ఖుల చిత్తము నొచ్చునట్లుగా!

******************************************************************************************************************************************

శంకరార్పణం - 2918

****************************************************************************************************

శంకరాభరణం సమస్య - 2918

"ఇద్దఱు పెండ్లముల్ గలిగెనేని ప్రశాంతత దక్కు నిత్యమున్"

సెకండ్ సెటప్: 

కద్దుగ రెండునున్నవిగ కన్నులు కాళ్ళును చెవ్లు చేతులున్ 

ముద్దుగ తిత్తులూపిరివి ముక్కుకు తూటులు మూత్రపిండముల్ 

కొద్దిగ కష్టమైన సరి కొండొక దానికి స్పేరు పార్టుగా

నిద్దఱు పెండ్లముల్ గలిగెనేని ప్రశాంతత దక్కు నిత్యమున్

(కంది శంకరయ్య గారి సౌజన్యంతో )

************************************************************************************************************************************************

శంకరార్పణం - 2670

*****************************************************************************************************

శంకరాభరణం సమస్య - 2670

"దేహమ్మున్ విడనాడి చూడుము సఖా ధీరత్వ మేపారఁగన్"

సోనియా రాహుల్ తో:👇 

"ఆహా! ఏమవి చేపవోలు కనులో! ఆ వాక్కు కప్పల్ వలెన్!

సాహాయ్యంబును డింపులయ్య! కొనుమా జంజాటమేలా యికన్!

బాహాటమ్ముగచెప్పెదన్ కనుమురా బంగాలు టైగర్ను...సం 

దేహమ్మున్ విడనాడి చూడుము సఖా ధీరత్వ మేపారఁగన్!"

(కంది శంకరయ్య గారి సౌజన్యంతో)

***************************************************************************************************************************************************